盃王練馬師大摩一向好少收來投馬，但有時高分馬卻例外，馬主張廣軍與莫湛雄之「綫路光輝」上月便由何良轉投大摩。

「綫路光輝」拉倉後，本月初易廄初出已引起注視，於二班田草1400米有好表現，雖然冇辦法威脅到頭馬兼打吡正選馬「平海福星」，但起碼初次在港上名獲得季軍，拉倉後表現的確有進步。

「綫路光輝」馬主最初好想隻馬角逐打吡，但大摩話隻馬嘅搶口毛病仍未完全改善，而且心智仍未完全成熟，過急扳上2000米打吡路程，只會適得其反，寧願一步一步嚟，佢特別安排一位具有豐富經驗嘅法籍騎馬人主操「綫路光輝」，希望教好隻馬嘅韁口。

「綫路光輝」今晚（14日）爭谷草第8場三班1650米，是牠降班首次角逐三班賽，對手減弱，如果隻馬適應到谷草夜賽嘅燈光的話，有力憑質素掃晒。