中移動（941）噚日繼續發威，連滙控（005）都要跟住佢升，搞到大市差啲就上破埋15500。
中移動業績基本上大家都讚好，但值唔值得繼續高追或者趁高獲利，外資大行就意見分歧，高盛與摩根大通繼續叫人買，目標價升至37元及38元，而一波就叫客沽咗先，因為上升空間不大。呢個時候錢多先至有話事權，以噚日形勢，大市想跌都跌唔落，熱錢似乎仍要將港股推高，而滙控亦就快熱完身。
其實噚日表現最好的藍籌應該是聯想（992），出完首季業績後，各大證券行均認為併購IBM的PC業務後表現理想，紛紛重估其價值，噚日股價抽高至3.125元,升10%，成交高達4.98億元。高盛定目標價3.18元，美林料見3.75元，若果併購的協同效益繼續有好消息，相信可長炒長有。

南太電子　撈底三思

南太電子（2633）連日被大股東南太集團減持，股價3日內跌30%，噚日單日跌18.78%至1.34元，成交達5598萬元。大股東見到跌勢咁急，即刻向外澄清話冇特別原因要減持，而減持行動已經停止。
黑客話，大股東話停止減持，唔排除係見個價唔靚，所以唔沽住，難保日後重返1.60元以上後又再次減持，有意撈底者要三思。
中國資源（661）的62.08%股權已經易手，WangJianSheng以平均每股3.3仙購入11.645億股，涉資3844.2萬元，收購價每股3.3仙較停牌前報價0.175元大幅折讓81.13%，即使新主提全購，全購價可能係3.3仙，對於小股東而言，根本冇着數。
阿虎