銀娛（027）員工遊行，要求資方改善待遇，券商德銀又踩多腳，指員工成本上升會拖累業界毛利，濠賭股慘遭洗倉，大部份都跌半成過外。中央突然推出「微信十條」，要求用戶以實名開戶之餘，在網上share新聞隨時犯法，擺明車馬收緊資訊流通自由度，剛創新高嘅騰訊（700）應聲下挫。兩大火車頭齊齊失靈，恒指焗住跪低，失守10日線，下一站支持睇20日線、即大概二萬四大關。

現價市賬率僅0.63倍

個股方面，呢排喪炒嘅資源、券商股亦有壞消息，前者有中鋁（2600）旗下山西附屬發生爆燃意外，導致四人死亡，後者則有神股第一上海（227）發盈警，影響板塊氣氛。炒友走位靈活，立即轉戰殼股，英發（439）爆升17%，達進（515）搶高11%，除因資金繼續輪流炒外，相信同俊和（711）一份通告有關。
先講講背景，俊和7月初公佈，由大股東李蕙嫻及彭一庭持有嘅GT Winners（持有俊和約56%股權），獲獨立第三方洽購股權，變相賣殼，最新通告則指潛在買方正透過其專業顧問，就潛在交易進行盡職審查，意味賣殼交易有進展。消息刺激俊和炒高11%，但同早前高位計，仍有22%水位，相比英發及達進已逼近甚至升穿前高位，俊和擺明大落後。另一重點在於俊和現價市賬率僅0.63倍，較英發及達進平均嘅16.9倍，平足96%，有咁強嘅資產做後盾，買落都安心啲，噚日只係翻叮第一棍，絕對追得過。

唐牛
https://www.facebook.com/tongcow88