鄧麗欣、方力申及任賢齊今早參加《揹水一戰》挑戰15公里跑，小方連續八年參與活動，今年較Stephy遲起步15分鐘，有機會喺山道追回舊愛，他聞言後說：「隨緣，見到咪見今次以體驗為主。」兩人台上冇交流，小方承認話：「係呀！少啲！好真實，從來唔做戲，講嘢又唔知點。」講到他主動搭住Stephy嘅手，佢驚訝反問：「有咩？唔知！可能慣咗手，冇避開都幾有禮貌。」

分手一年，小方同樣覺得時間過得好快，而fans就好長情久不久重提兩人嘅事，問佢係唔係都長情及感觸？佢收起笑容感慨咁話：「唔講咁多，無力跑，梗有感觸，越講越唔知講咩，有句說話好啱，懷念只係回憶，多過懷念一個人同一件事，人係會繼續向前行。」

兩人同時跟太陽娛樂約滿，Stephy形容同舊公司關係一直好好，直至離開都係愉快，暫時係自由身接工作，亦有公司洽談中，會唔會諗自組公司，佢話：「今年除演藝工作，都有自己生意，有公司幫會好啲，希望呢兩個月内有定案。」小方同樣考慮係唔係簽公司定自組公司，但表示黄栢高指將來可能再喺電影上合作，跟舊愛會唔會合組公司？小方就話：「梗係唔會，之前講過工作上各有各意見。」

小齊噚日從武漢返港，由於腰傷未好，佢擔心揹水會傷及腰患，所以不停讚小方大隻，隨時拜託對方幫手揹水。日前被影到同太太行中環，佢就話一有機會便四出食美食，享受喺香港自在生活，加上近日不停出外搵靈感寫劇本，特別造訪香港最地道街景，佢指有興趣到訪一樓一睇睇：「等我寫好劇本就拎正牌上去睇，到時同太太去就唔係咁適合，應該同助手去，有乜就賴落佢度。」