李國麟對無綫可謂「愛之深‧責之切」，佢日前接受傳媒訪問時，除咗慨嘆大台糟蹋資源之外，佢亦有幫公司講好說話：「好多人話TVB啲劇唔得，編劇日日都『屙』，乜都乾晒，唔怪得佢哋。喺TVB有名未必有利，但唔明點解要鬧？TVB畀唔到我做重要角色，都有閒角畀我做，糧期準，養咗我幾十年，超碼畀到我一頭家，畀到我安全感。」

不過，一台獨大問題依然存在，61歲李國麟將於今年4月約滿，但到o依家都未有人搵佢傾續約，問擔唔擔心？佢話：「佢哋好『他他條』嘅，始終香港得一個台，你唔做，做邊個呢？(奇妙電視5月開台)多幾多都好，冇本地製作、冇劇集、冇簽演員根本起唔到作用，冇衝擊都係一潭死水，得一個台。曾經有一個王維基，佢起過一個浪，但問題係一冚就熄咗，有好多大家都明嘅因素啦。!」

李國麟坦言去留仍要視乎對方開出嘅條件，但似乎又唔係好樂觀，佢話：「我去年都想唔續，但冇TVB冇今日嘅我，亦冇大陸市場，TVB畀我感覺係好需要我呢類演員，我都唔想離鄉別井。但我又覺得今年條件都唔係幾好，好似話公司賺少咗，唔係冇得賺，係賺少咗，咁都要向股東交待，我好明白要維持盈利，增加唔到咁梗係要向我哋開刀啦。(唔簽點算？)咪打游擊囉，冇話驚唔驚㗎嘞。」