2014年11月石硤尾邨美映樓某單位發生煤氣大爆炸慘劇，戶主當場死亡，而9名到場救援的消防員中6人重傷危殆，最終一人重傷死亡，當中一位大難不死的，就是育有一名女兒的王耀祖。意外發生至今已有4年，死裡逃生的阿祖，今年父親節又怎樣過？

採訪：林穎嵐 攝影：麥超億

美映樓大爆炸意外，或者很多港人都忘記了，但對阿祖女兒王悅曈而言，卻是一輩子都沒法忘記的事。「知道爸爸發生意外，你係咪好驚？」記者問。曈曈只是用力點頭，淚水即奪眶而出，看著女兒痛哭，在旁的王祖耀都紅了眼睛。意外發生後，阿祖憶述，當時主要為面部燒傷，留院約10日後回家，及後更停工約一個月。「爆炸嗰刻，我真係冇諗到自己，只係諗到千其唔好有事，老婆同個囡等我返去……我真係唔可以有事。」阿祖深知不能有事，除了因為「一家大細靠晒佢」之外，另一原因，亦是最重要的原因是，當時只有7歲的曈曈，翌日要參加跳舞比賽。

從小學習跳舞的她，一星期有數天的課後要到舞蹈學校學跳舞，而她的最佳拍檔非同學仔，而是她的廿四孝老竇，「嗰年佢嚟唔到，咁我點算呢？爸爸唔喺度，冇人幫我拉筋，點算呢？」曈曈說時露出緊張的神情，一點也不誇張。稱得上廿四孝，阿祖這位慈父當然「有料到」。現時仍擔任消防員的他，是曈曈跳舞學校的常客，「盡量都會抽時間嚟接佢，老套啲講句，要珍惜眼前人，你唔知道，會唔會今日出咗門口就返唔到屋企，唔知會唔會再發生㗎嘛。」

曈曈在訪問期間，偷偷跟記者說：「爸爸跳舞唔靚啊！」阿祖坦承自己非跳舞的材料，他即場跟女兒試跳一段，甩beat、舉錯手、走錯位……蝦碌情況頻生，但有趣是，曈曈在整個訪問中，最興奮和手舞足蹈的就是這個父女共舞環節，是因為爸爸跳得太醜？非也，她說：「有爸爸喺我身邊，好多小朋友都冇咁嘅機會，但我有呢個爸爸陪住我，係好開心。」

除了學跳舞外，曈曈的日常生活都幾乎與爸爸連成一線，「我覺得我呢個人生，如果冇咗爸爸都唔知點算好。」曈曈明言爸爸不但是她的保姆，更是她的「大廚」，「爸爸成日煮飯我食，有時會整三文治，有時會係晚餐囉。」不過這位大廚在傷後一個月完全停工，「嗰個幾兩個月我都冇煮飯，亦冇去撻過煤氣爐，起初受傷嗰段時間，一聞到媒氣啊，聽到啲巨響啊都會紮一紮，如果你第一身親身感受過呢個環境（爆炸意外），真係呢，嗰個烙印，對我嚟講都幾深刻……」但在兩個月後，這位慈父又重拾鑊鏟，「咁始終都要做返呢樣嘢嘛，即係嗰個係一個心理嘅問題，嗰個煤氣個味道，你始終都要面對返。」

你敢爆，我敢獎！ 即Call《蘋果》24小時爆相爆片熱線 ：63836568