當年今日
關於我們

【職場寶鑑】人總是犯賤 得不到的越想得到(久保)

蘋果日報 2018/12/21 12:00

久保職場寶鑑investMANresume見工

而家興喺Tinder、CMB度識女仔,左Swipe 右Swipe ,好快就會識到仙氣女神、山系Yama Girl 、Gfable 文青系……,然後交換IG ,約出黎 「見面」,你知啦,今時今日其實唔少倫敦金同美容Sales。
關於約candidate,我想講分分鐘難過溝女,唔chur得,又唔hea得,拿揑鬆緊真心難。但有啲囡囡就係鍾意無限text,唔見面,又點拍拖?唔見面,又點幫你搵工?家陣唔係溝你喎,只係想了解吓,睇下個Resume同真人係咪對辦。約幾次出嚟,唔係有Ad-hoc Project,就話屋企有事,甚至係突然大姨媽探訪(呢個理由我真心聽過幾次)。叫我就咁跟住張A4 Resume 個啲零零落落工作經驗同佢Match。咁點搞呀?同十幾年前細個玩Line有咩分別?(我講緊用固網電話嗰隻交友Line)
好啦,又推又拉又呃又氹,終於約到出嚟。試過有個Candidate份Resume話自己Outgoing ,又青年商會Committee,又扶輪社義工,仲要鍾意行山潛水,(雖然我到而家都仲唔知道點解會有人喺履歷表上寫自己興趣,其實佢哋嘅目的係乜?)點知出到嚟見面係氣氛終結者,十問九唔應,一係就嗯!哦!呀!。要Keep住交流,Open Question作結,你識唔識?
又有個話自己係Harvard University Grad ,英文講個Self Introduction 都食螺絲,原來只係Exchange 一個Semester。奉勸各位,學歷真係唔好做假,係龍係蛇,一開口即刻現形。
而且啲人好鍾意去韓國影証件相,個個影完索過Lovelyz 智秀,正過「國民妹妹」的IU;點知一見真身變「飯局美人」Anna,HR對住張相都搵唔番你,強烈建議大家去傳統影相舖,或者地鐵站影番正正常常証件相。
媽媽教落:「欲速則不達」,但呢個世代咩都講效率,Fast Fashion 、特快e道、10分鐘剪頭髮、Network 由56k 變1000M,係潮流所趨,連愛情都可以速食,聽過有人一年內拍廿次拖,終於搵到Mr Right!
當然唔係鼓勵你見廿份工,先揀The One。呢個世界冇完美,10樣中5樣以上 ,已經要感恩。又要人工高福利好,但又唔打得唔捱得。最緊要係,你唔踏出第一步,見一見個Headhunter ,又點會有筍工彈畀你。三顧草蘆?發夢返三國啦。
印象深刻有位Candidate叫Fiona,約咗佢五次都會話:「得㗎啦!你照send我過去啦!你只不過係一個Agent,其實見你都冇乜意思,又要我特登過海山長水遠過嚟,真係貪你靚仔咩!個客真係有Interview你再打俾我,教我點樣做啦!」但係Fiona好搞笑,佢每兩個月都會打電話問我:「喂!呀邊個邊個,最近個Market點樣?有冇筍工介紹?我想轉工。」咁不如你自己上求職網站啦,駛乜搵我,如是者我同Fiona神交咗接近半年。人總係犯賤嘅,越得唔到嘅嘢越想得到、越約唔到嘅人越想約,神秘嘅Fiona,我真係好想見妳廬山真面目。師父教落,心理學來講,有樣嘢叫「增強」(reinforcement)概念,即係當你做出一個特定行為,都有一定機會因爲咁樣而得到某啲獎勵時,你會持續去做同樣行為,如果你每次約對方食飯,對方都答應,會令你持續邀約。心理學又話,如果對方持續拒絕你,但係你始終不屈不撓咁樣去約佢,內疚感會令到佢下次拒絕你嘅機會減少。Fiona,我終有一日會約到妳。
雖則我冇彭于晏咁靚仔,但都算係五官端正,一表人才! 同埋,I don't bite!見個面,認識吓你,係履歷表以外的你。不過襄王有心,神女無夢,我都無計。
文:久保
人稱「全職獵人」獵頭界紅人,見盡獵場光怪陸離,商場奇聞軼事。
https://www.facebook.com/fulltimeheadhunter/
investMAN
For People of Style & Substance
掌握理財智慧 感受生活品味
http://facebook.com/investMAN.hk
empty
今時今日唔知點解仲有人喺履歷表寫自己興趣,其實目的係乜呢?