唔多喺立法會會議廳蒲頭，被部份民主派議員戲稱為「尿震」嘅發展局副局長廖振新，繼前排試過用35分鐘開電腦，又誤以為立法會部電腦係touch screen後，今日又有笑料。佢喺會上回答議員提問時疑似發夢，將建制派議員經民聯石禮謙會上嘅「風水」問題聽成「供水」問題，於是話要「同水務署傾傾」，結果激到石禮謙扎扎跳，會上激動喝斥：「係風同埋水啊！風水係一個中國概念嘅環境啊！」

立法會今朝傾龍鼓灘填海計劃衍生嘅環境問題，石禮謙質疑當局根本無諮詢當地原居民，又問當局有無問過原居民嘅風水問題。月薪廿幾萬嘅廖振新好似發緊夢咁，話當局推行填海計劃時，會做足各樣技術評估，「供水當然係其中一個要求，一定做到有足夠的供水先會落實，村民若有個別供水問題，我哋可以返去同水務署傾傾。」

聽到如此「九唔搭八」嘅回應，石禮謙即場彈起身激動喝斥：「係風同埋水啊！風水係一個中國概念嘅環境啊！」廖振新此時方如夢初醒，即場向石禮謙認衰致歉話：「對唔住，我聽錯咗，我以為講供水問題，風水問題我哋都會同村民溝通吓，睇吓有乜嘢可以做。」

會後廖振新搵埋同場嘅環境局局長黃錦星同石禮謙耍冧，話出錯皆因會上聽筒收得唔清楚，其間佢同石禮謙猛講「唔好意思」後，先敢離開立法會。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
《囚牢之疆》 專頁
揭開集中營邪惡面紗
獲2020年人權新聞獎「多媒體（中文）」大獎
-----------------------------
App內1-Click訂閱《蘋果動新聞》
按此了解更多