紅星Robbie Williams除咗唱歌出名，仲係有名嘅「壞孩子」，吸毒酗酒樣樣齊，最近佢受訪，就表示自己受情緒病困擾，仲話做歌手呢份工會整死自己！43歲嘅Robbie Williams接受《The Sunday Times》雜誌專訪，表示呢份工「危害健康」，又指：「最終會整死我，除非我用另一個角度去睇事物。」佢仲透露自己被抑鬱症困擾：「（抑鬱）影響到我嘅家人，如果我唔紅，仲會唔會受抑鬱影響？我唔知。但我覺得一定唔會好似而家咁嚴重。」佢指因為全世界都睇實佢一舉一動，令佢更大壓力：「你就好似被一個放大鏡照住，全世界都注視你，當然你嘅挫折都會被放大。」