古巨基今日喺灣仔舉行記者會，宣佈將於4月11及12日喺紅館展開「我們世界巡迴演唱會香港站Part 2」，基仔表示，有感於開一個記者會要花費10幾萬，佢就想做更有意義嘅事，決定花費20萬包咗25架紅Van，聽日請市民免費搭紅Van，兩條路線分別為：上環至荃灣，時間為中午12點至晚上10點；旺角至大埔，時間為下午3點至凌晨1點。問到基仔會唔會化身為乘客？佢笑住話：「有機會亂入㗎！」

講到今次開Part 2，同上次有咩唔同？上次不慎發生墮台意外（新聞連結： https://bit.ly/2G79ouM ）嘅基仔話，今次會加倍小心，佢話：「會有新嘅歌單同製作，同埋將1呎幾闊嘅舞台通道，加番3呎畀我，經過上次意外，我會小心，警覺性一定提高。」

提到表演嘉賓方面，基仔透露想邀請好友黃子華，「上次我開騷，撞啱子華要閉關，所以今次想請佢，希望大家為我集氣。」會唔會請埋「叱咤樂壇我最喜愛的男歌手」古天樂？基仔笑住表示：「我要多謝古仔幫我拍演唱會宣傳片（新聞連結： https://bit.ly/2Ha5fMv ），上次佢以『五虎』形式嚟，睇下今次又會唔會以個人形式嚟做嘉賓，佢攞完獎要嚟吓我演唱會。」

此外，對於門票由聽日起喺城市售票網發售，基仔話：「第一日係網上售票，第二日開始先至喺售票處賣飛，呢個係政府規定嘅新方式，大家都要跟從。」覺唔覺得呢個方式有改善？佢話：「一個最好嘅方式係要用時間去傾同討論，透過網上售票係購買方式嘅進步。」

提及早前劉德華因流感而取消餘下7場嘅演唱會（新聞連結： https://bit.ly/2CFa2B7 ），近日開騷嘅張學友又指自己身體不適（新聞連結： https://bit.ly/2AGiXAP ），基仔指：「人多嘅地方，我會帶口罩，開騷前要特別注意身體。」

精選娛聞，喺晒《娛果》
http://fb.com/appledailyent