港大校長徐立之唔知係咪一早收風，今日喺陸佑堂舉行第一百七十一屆學位頒授典禮，頒個名譽法學博士畀煲呔，實在錦上添花。至於有「公職王」之稱嘅李業廣亦榜上有名，獲頒名譽社會學博士。現任港交所主席嘅李業廣係誠哥好友，亦係老董智囊，煲呔主政都唔敢唔重用佢。
李業廣獲特首委任再度做積金局主席，任期兩年，噚日起生效，呢個委任肯定係老董在位時嘅決定，Charles舊年喺布吉大難不死，一返香港就有人通知咗佢要冧莊。
煲呔𠵱家萬事都要穩定，積金局屬唐唐範疇，佢都一樣唔想大變，但啲董事做咗好耐，都要換啲人，結果方正，李國寶、呂明華同胡紅玉功成身退，加番孔令成、李王佩玲、孫德基同黃定光；李啟明同譚耀宗等就繼續做董事。

傳真︰2623-9278
電郵︰[email protected]