香港人唔知點解一旦從事公務、從政或做公職，就會變得煞有介事，「撚」起把聲，好似范太講嘢變咗黃師傅咁。又或度金句、SoundBite有咁絕得咁絕，排比對偶，好似張文光，出口必有金句。政治美學是講求政治人有一種舉重若輕嘅優雅，有自信、有幽默，也有詞鋒，但又唔會畀人睇到太刻意經營，這是成功政客基本要求。

中國政客很少能達到標準，馬英九憂國憂民苦口苦面，好似膊頭有千斤重，背負百年中華民國復興重擔，仍未洗甩台式文藝小生那陣「瓊瑤」除。我哋曾特首以英式紳士造型出現，例如用英文發言，比用廣東話來得輕鬆幽默，在亞洲區政客中算有特色。但佢有一種80年代大香港人DNA潛伏體內，就係招積、寸嘴、鍾意窒人，用內地講法係唔夠大氣，細眉細眼。至於強國領導人，近年好似也有溫總溫情Show，但舞台劇斧鑿之痕太深，冇咗舉重若輕，唔覺唔覺感動你嗰吓。
在本地有一條友仔做到呢種水平，就係林海峰，佢做節目評論時事，或上舞台做Show自嘲，總有一種求求其是是但但嘅感覺，但又有一兩下笑位彈出嚟，有個特別角度去解構時事。佢老友谷德昭話，林海峰為人不單止唔求其，仲病態地認真。每朝準備晨早TalkShow幾粒鐘粒聲唔出，將節目中要講內容寫在報紙空白位置，開咪時以求求其態度語氣講出嚟，呢種「完美求其主義」，正係成功政客應有姿態。
今日政客只知中世紀意大利思想家馬基維利作品《君王論》，教大家講求權術，不知當時有另一本流行作品卡斯蒂利奧內的《廷臣論》，講從臣應有的美學姿態，就係要「舉重若輕」。一連幾日施政報告辯論，係一年議會重頭辯論，可惜引入直選已20年，議員官員仍不明白政治辯論的姿態、詞鋒，人人照稿讀出陳腔濫調，看來佢哋都要向林海峰學習。
添馬男