【選校草入行】首拍劇集《救妻同學會》 李任燊享受演人性黑暗面
G殺救妻同學會李任燊藍天白雲
曾參加過大專校草選舉獲冠軍嘅李任燊(Kyle),最近喺劇集《救妻同學會》中飾演Jason,同胡鴻鈞、劉佩玥等合作。今次係Kyle首次拍電視劇,但其實佢之前拍過唔少微電影及電影,好似《藍天白雲》入面,佢就做鄧麗欣老公,之前仲客串過ViuTV劇集《詭探》。
今年30歲嘅Kyle,早前喺觀塘接受《蘋果》專訪,今次拍電視劇係咪想入屋?佢話︰「我只係想做戲,把握每次機會,無論邊個平台,有機會我都想試吓,例如演話劇同舞台劇。」講到今次拍劇嘅經驗,佢話獲益良多︰「之前拍電影成部戲都係個零鐘,今次收到呢個劇本嗰厚度,嘩!有八集,一集有兩個鐘,咁多內容同台詞,真係驚自己handle唔到,可能係一班年輕人,一齊玩好開心,好快自己都投入到,消除緊張嘅心情。」
11年因為選校草而入行做model,當時Kyle喺香港專上學院修讀社會福利副學士,其間拍咗唔少廣告,12年參與港台青春劇《DIY2K》演出。佢拍完首部電影《藍天白雲》後,Kyle曾掙扎過係咪追求做演員,還是做社會工作?佢話︰「當時我同《藍》片嘅導演張經緯傾過,自己做演員係玩玩吓,定係想做社工。後來決定畀自己一個時間,去北京電影學院表演系讀一年課程,真真正正去面對,自己係咪喜歡演戲。」
Kyle將之前拍廣告賺嚟嘅錢,膽粗粗一個人去北京讀書,「屋企人都支持,可能我畀佢哋睇到,我今次真係專心同投入,去做呢件事。」從來冇離開過屋企嘅Kyle,自問唔係獨立嘅人,所以上到北京冇耐就病倒,「喺屋企有阿媽理,但係北京乜都係自己,搵醫生睇,吊唔吊鹽水都要自己決定,真正過獨立生活。」初到北京時,Kyle喺朋友帶領下周圍遊覽,點知首個月就用凸錢,「之前係好開心,不過第二個月開始要節制,放咗學唔可以任意玩樂。」
講到演戲,最近Kyle演嘅新戲《G殺》飾演一名阿氏保加症嘅男仔,由於Kyle曾做義工,又修讀過社會福利,故接觸過唔少自閉症、狂燥症嘅小朋友,「讀書時入門第一步就係要讀心理學,當我拍戲時,要理解另一個人嘅人生,係好有用。」自言喜歡演沉重角色嘅Kyle,笑言︰「我喜歡演一啲人性嘅黑暗面,因為情緒上有得發揮,自己同個角色牽引住,好似越踩越深咁,可能話我係變態,但我好enjoy。」
Kyle曾經係人哋眼中嘅校草,曾拍過拖現在單身嘅佢,其眼中嘅女朋友又會係點?佢笑話︰「睇吓對方有冇自己一套嘅想法,大家嘅價值觀係咪接近,咁外表都會睇嘅,最主要係睇對眼,感受吓佢有冇靈魂,哈哈!」
採訪︰羅婉玲
攝錄︰馮嘉銘
化妝:Christy Lam
場地︰如心艾朗酒店 L'hotel
精選娛聞,喺晒《娛果》
http://fb.com/appledailyent
《救妻同學會》中,佢成年後係做律師,打扮成熟,與朱智賢演對手戲。