一年一度嘅大型音樂會Clockenflap前晚喺中環海濱長廊舉行，唔少熱愛音樂嘅人都會買飛入場，欣賞吓嚟自唔同地方嘅歌手演出。啱啱同老婆徐濠縈喺外國玩完跳傘返香港嘅Eason陳奕迅，前晚亦有現身音樂會。

叉足電嘅Eason心情勁靚，佢同LMF成員之一嘅阿傑(梁永傑)兼幾個朋友一齊到場，雖然前晚天氣已經轉涼，加上表演場地又近海邊，現場啲風勢都好大，但係一向勁吹得嘅Eason，又點會被風吹散呢個雅興呢？喺現場Eason拎住杯嘢飲，一路聽歌，一路同啲friend傾偈，講得最多嘅，梗係Eason喇，不過大家都似乎習以為常，睇落又真係好寫意喎！

Eason傾傾吓又見到導演莊文強，於是佢又轉移陣地，走咗去聚吓舊，就算啲風吹到佢啲頭髮都豎起，佢都一於冇理繼續傾，唔覺唔覺幾個男人企喺度傾咗10幾分鐘，Eason再會合阿傑同啲朋友，繼續再周圍行。

可能因為場地啲燈光比較黑暗，所以現場唔係太多人見到Eason，只係行到近舞台嗰邊，有fans見到Eason，於是好高興咁走去搵偶像影相，心情勁靚嘅Eason，當然唔托手踭，來者不拒，任影唔嬲，最後佢同啲friend傾多陣走人！