韓風停不了，憑經典韓劇《大長今》紅遍亞洲的韓國女星李英愛接力來港，昨晚她盛裝現身灣仔君悅酒店，出席法國珠寶名牌卡地亞高級珠寶晚宴，同場還有千億新抱徐子淇及「跳水皇后」郭晶晶與夫婿霍啟剛，中、港、韓三地美麗闊太同場較量，艷光四射。愛姐自嫁給從事電訊業、身家過百億的美籍韓國人鄭豪泳後，專心照顧一對3歲龍鳳胎子女，已甚少幕前演出，亦罕有出席商演活動，今次她重臨香港，身穿黑白色的韓國民族服，佩戴近4,300多萬高級珠寶，依然星味十足，令人重溫她經典的「大長今」美態。

在訪問前，大會叮囑傳媒不要提及「歲月號」沉船災難等問題，問愛姐為何以韓國民族服打扮現身？她透過繙譯接受訪問：「今日係特別日子，覺得韓服同卡地亞珠寶好襯，珠寶花喱碌碌好靚，一般都係用黑色晚裝嚟襯先靚，我覺得韓國服更突出味道。」對於珠寶收藏，愛姐笑言不多：「本身喜歡casual，有casual首飾收藏，好似先生送結婚戒指，自己比較喜歡珍珠，今日戴紅寶耳環都鍾意，紅寶代表幸運。」問她會否接拍《大長今2》？她表示：「《大長今2》多人問，要幾個單位配合，導演、音樂、故事內容都要好好先得，諗好劇本再做，唔只劇集、電影，都想多啲活動見大家。」其後繙譯代愛姐回答不會接拍《大長今2》，她表示：「自己遲婚，對小朋友多啲愛心，呢個係好大原因。」

徐子淇以黑色性感晚裝谷胸示人，更笑言要代媽咪與愛姐合照，她說：「佢係我媽咪偶像，嗰時喺英國讀書，佢追得好緊要，有睇佢相，好靚，想見真人，同佢講吓湊小朋友啲趣事。」之前她夫婿李家誠腳傷，她表示丈夫去了內地：「有朋友畀咗老虎骨浸茅台，佢飲完好番好多，又有食田雞，我都唔敢錫佢，因為我好怕青蛙。」
郭晶晶也罕有穿白色低胸裙示人，與霍啟剛手拖手到場，晶晶再澄清懷孕傳聞說：「不是。」提到會否多追一個BB？她笑言：「如果有了一個男孩，當然想要一個女孩，不過再是男孩亦可以。」啟剛透露兒子已八個月大：「好鍾意出街，𠵱家開始學講嘢，想佢學識叫爸爸先，自己日日放工都有教佢。」
採訪：溫敏芝
攝影：陳慧安