過去一年備受封殺影響北上工作的黃秋生，對愛港行動召集人陳淨心嗤之以鼻。日前陳淨心仿傚黃安、舉報藝人，罪名任其賜予，包括撐佔領、反服貿、撐港獨、撐台獨等。黃安負責舉報盧廣仲，陳淨心舉報盧凱彤，結果兩人先後被退出南方草莓音樂節。

曾揶揄陳淨心係茄喱啡、「魚缸清道夫」，靠食魚屙廢物維生的黃秋生，今日接受《蘋果》電話訪問時，直斥陳淨心:「呢啲人唔好啋佢就最好，我都話佢係茄喱啡，做乜要啋佢？佢呢兩日都搞好多嘢，喺啲大陸網度，講到自己好似救國英雄咁，呢啲咁嘅人。依家唔係講緊你嘅態度，而係講緊你個方法，低莊呀。Even你真係一個愛國嘅人，你嘅行為都拉低咗佢哋。佢依家嘅方法係無恥，真係啋佢都黐線啦。」

「你最好所有啲大人物都鬧我，你唔讚我唔緊要，你鬧我啦，不能流芳百世，為求遺臭萬年，咁你同呢啲人一齊做咩啫？你唔報道佢，佢所有嘅行為都唔理佢，咁就最好喇。你唔去報道點會搞到件事情咁惡劣啫？我算你嘅出法點係好，但係你幫倒忙。有事情發生嘅時候，呢啲叫做幫倒忙，令事情惡化。你不停令到社會惡化，有爭議，指證邊個邊個，咁著黃色衫得唔得？我屋企有件黃色衫，咁著唔著得？下一步就係咁喇喎，『你仲唔怕我？我話邊個係就邊個係(唔愛國)』，我話劉德華劉德華就係，我話周潤發周潤發就係，咁你仲唔怕我呀？呢個根本係女流氓，大家使乜怕佢？」

唔知係咪陳淨心早有此一著，知道黃秋生會話佢講劉德華同周潤發，所以今日特別開一個post講佢哋，再搭多個梁朝偉。陳淨心女士貼上三人圖片，寫道:「我澄清，這三位藝人從來沒有表態支持占中，佔中初期員警用了催淚瓦斯(？)對付暴徒，暴徒中亦有十多歲的學生混雜，三位藝人只是心痛學生小孩。部分毒媒，報導有誤導性。」

如何理解陳淨心女士的神邏輯？秋生話齋:「呢個根本係女流氓，大家使乜怕佢？」