【Little Englander】恭喜冇咗「最自由經濟體」的污名(孫柏文)
孫柏文Little Englander
九十年代初,孫柏文仲係初中生。所有歐盟成員,為自己嘅貨幣鋪路入歐羅,將啲滙率鐵索連舟咁互相掛鈎。咁因啲人最信曾被高速通脹蹂躪嘅西德,全歐洲就學香港跟聯儲局咁,要硬食西德央行定下嘅貨幣政策。
點知,當時因蘇聯解體,西德即同東德合併。而當時嘅西德總理科爾,話東德人係一家人,所以就宣佈東德馬克以1兌1換西德馬克。呢個理論上好偉大嘅舉動,係喺完全唔知究竟有幾多東德馬克存在嘅情況下決定。
點知因為共產世界下,價格不能自由浮動,有錢都冇嘢買。個個喺床下底都一喼喼東德馬克(冇錯,柏林圍牆倒下嗰日,你攞西德馬克向東德人兌換,黑市價係5兌1。真係揸到科爾宣佈1兌1嗰日,確實trade of the decade)。
政策後果就係德國央行忽然見到貨幣供應大增下,就即刻瘋狂加息去收水避通脹。
咁全歐洲嘅央行,因滙率掛鈎,就焗住一齊加息。而喺英國,佢哋啱啱經過咗戴卓爾夫人執政下嘅十幾年樓市大牛市,個個借爆廠。當啲息口加到十幾厘時,樓價就爆咗,英鎊同馬克脫鈎。英鎊冇入歐羅,歷史亦因呢個好似係小小嘅政治決定而改寫。
今日講歷史為乜?當年喺東德,香蕉係個可遇不可求嘅珍品。根據東歐政治學專家話,香蕉珍貴嘅程度,啲人如果攞到條,係會等到聖誕節大日子,食大餐時,切片每人一片咁品嚐。
所以柏林圍牆倒下時嗰排,西德政府向每個跨牆東德人俾咗啲零用錢。每個東德人一去到西德攞到零用,清一色都係第一件事去買蕉食。
我記得十年前同今日已成議員嘅邵家臻做電視節目,分享呢件歷史。去笑當時仲係議員嘅黃毓民,因財政司司長曾俊華薯片叔,唔搞多啲社會主義福利,向佢掟蕉件事。完全唔明攞社會主義統治下最缺,自由經濟下多得很嘅香蕉來掟,嘅嗰種諷刺。
當時,讀過海量咁多左派書、作為左膠嘅邵家臻當然唔信我講,覺得我呢個只識乜乜日平均線嘅財演老吹。所以就問89年喺德國留學,另一節目嘉賓,今日成為拉特朗普撐反送中嘅大旗手陳雲,我係咪老作。點知當年寫嘢大聲過講嘢嘅陳雲細細聲話:「孫柏文冇講錯。」
噚日,我傍晚時份喺倫敦落樓下間Waitrose超級市場買餸煮飯。去到時見到一個又一個掃到冇貨嘅貨架。意粉、粟米片、罐頭、廁紙,連薯片都掃清。
多年來,喺股市睇電子報價機,幾年一次嘅大牛市中,都會出現啲股票一格一格被好友掃清貨嘅場面。不過喺實物世界,真係咁大個人第一次。
我就係企喺呢啲吉晒嘅貨架旁,突然忍唔住微笑。一路生活喺自由市場嘅我,第一次感受到生活喺計劃經濟下人民,有錢都冇嘢買嘅感受是如何的。就喺嗰刻,我突然靈機一觸,行過去生果部望。點知,原來仲有好多西人最鍾意食,青BB嘅香蕉。原來,嗰刻都只係A貨共產主義經驗。
到落筆嘅今日,起身落去Waitrose買麵包做早餐。噚日空空如也嘅貨架,又再一次充滿琳瑯滿目嘅貨物。我作為自由市場塔里班,絕對承認自由市場下可出現短缺。不過我可以賭,自由市場解決短缺一定每次、喺邊到都快過你靠政府計劃。
多年來好多香港人覺得係恥辱嘅「最自由經濟體」,恭喜你哋早幾日出排名時,終於甩難。呢個豐功偉業,唔係政府嘅個人成就,而係各黨各派、好多選民支持都有份嘅成果。前港督彭定康喺佢最後一份施政報告曾預言過話:「一國兩制,最終會死喺某香港人嘅手上。」自由經濟也是了。
今日帶病毒回港避疫的人,它朝唔使返來,亦會感受到乜都靠晒政府嘅好處了。