林鄭月娥嘅特首辦有新人上場！職級屬D2、由政務官擔任嘅助理處長（傳媒）由姚繼卓（Arsene）擔任，噚日行會前後當然都有同特首辦主任陳國基陪同林鄭現身。
呢個位嘅職責包括協助新聞統籌專員同傳媒聯絡、為特首制訂公關策略等，煲呔年代係心戰室成員，梁振英上場後角色就變得次要，大家稍有印象可能係黎日正，皆因梁振英自認超然時佢喺隔籬超自然打突，其後調咗去瑞士日內瓦海外辦事處。
至於新面孔Arsene今年38歲，港大畢業後就喺2001年加入政府，做過好幾個政府部門，2004年至2006年喺房屋及規劃地政局做助理秘書長，參與西九文化區發展。

曾為新地案作供

2014年佢仲因為許仕仁新地案要出庭作供。之後佢去咗日內瓦辦事處，返港後擔任財庫局首席助理秘書長（財經事務）同發展局首席助理秘書長（規劃及地政），今次係佢首度做同傳媒接觸多啲嘅職位，佢話要多多學習。
八方仲發現，佢係保良局莊啟程第二小學校友，該校2013年簡介資料嘅校友會欄目仲有Arsene張相㖭。