鄧麗欣(Stephy)同方力申嘅世紀分訊，震驚整個娛樂圈，兩位當事都否認分手牽涉第三者，但今日就有報道圖文並茂話Stephy搭上台灣TB小牛，見到佢哋好Sweet咁暢遊台北。

其實Stephy除咗曾當北京係佢第二家外，佢都好鍾意台灣，上月就約好姊妹區文詩母女，一陣去台灣玩，區文詩仲係微博上載三個女人嘅到此一遊旅行合照添。其實今次佢斷正，比周刊影到佢同小牛密會，並非第一次，早係2004年，Stephy就比傳媒影到佢同陳冠希(Edison)係台北蜜會。

Edison同Stephy係2002年合作電影《九個女仔一隻鬼》時種下情根，可惜當時男方身邊已有女友陳文媛。兩年後，Edison同陳文媛分手，就傳Stephy以「住家菜」成功打動Edison，仲約埋一齊去台北旅行。但為咗掩人耳目，Stephy就同另一「餅碎」女吳雨霏(Kary)先行出發，Edison就隨後先到，報道仲話佢哋喺酒店短聚十小時，仲去咗夜場耍樂同到西門町買手信添，雖然當時兩位當事人都無做回應，但Edison嘅前女友陳文媛就送上祝福囉！