現年38歲嘅「韓國第一大美人」金喜善，自從做咗人妻同阿媽之後，佢工作量都比以前少咗好多，不過閒時佢都會喺Instagram晒吓自拍照，呢位靚媽仲keep得好好0添。

而噚日金喜善就喺Ig上載新照片，相中佢就攬住兩隻狗狗，頭貼頭影相，其中一隻狗狗個眼神仲好似睥住個鏡頭咁，好鬼搞笑。不過大家個注意力就集中喺金喜善個樣上，事關佢以素顏示人，雖然有少少眼袋同埋黑眼圈，但比起平日化濃妝嘅佢更加清麗，唔怪得之咁多男仔唔鍾意另一半化濃妝，因為有時素顏個樣真係仲靚過化妝嘅樣。

網民大讚金喜善唔化妝個樣好清秀同埋有氣質，仲話睇到佢唔化妝個樣後都深信佢冇整容。

至於另一位人妻朴秀珍，佢去年7月同韓流始祖裴勇俊結婚，上月宣佈做阿媽，現時懷孕兩個多月，朴秀珍呢位準阿媽都不時放相迎Ig，噚日佢繼續放新相，30歲嘅朴秀珍本身身材纖瘦，所以即使懷孕都唔覺佢身形有所變化，而佢仲繼續着住貼身牛仔褲，足見身材冇走樣。