李克勤，一個香港人冇乜機會唔識嘅名字；當然，佢嘅名氣絕不限於香港，幾乎有華人嘅地方，點都一定會有人識得李克勤。

克勤，似係一個陪住大家成長嘅名字，係哥哥、係朋友、係偶像；克勤，參加歌唱比賽攞冠軍入行，最有印象嘅，係佢唱歌唱到粒喉核震吓震吓（電視台有時會zoom近比觀眾睇）、仲有佢同譚詠麟嗰種似父子又似老友嘅組合，再唔係，每逢4年一度世界盃總會諗起克勤講波。

克勤唱過嘅經典歌，識《紅日》、《夏日之神話》嗰啲是常識吧，仲有冇人記得佢唱《舊歡如夢》嗰隻「向左un向右un」嘅舞？佢喺《Purple Dream》專輯封面嗰個造型有「藍寶石王子」之稱？《只想您會意》曾經係好有人氣嘅茶記意粉？（但可能冇人食過…）

克勤嘅關聯字：大台契仔、左麟右李、港姐（佢老婆係港姐軍盧淑儀）、足球、送禮勤、曼聯、容祖兒、實力派歌手……

將於9月喺紅館舉行30周年演唱會嘅克勤，日前帶《動新聞》去到大坑嘅茶餐廳，落區做民調，睇吓班街坊鍾意佢邊首歌。佢一去到茶記坐低搭枱，先叫碟「筍嘢」蔥油豬扒飯加杯「爆檸」凍檸茶，佢仲同坐對面嘅哥仔講：「人哋開騷要清淡，我就唔使，仲要有咁肥膩食咁肥。」問到哥仔鍾意佢乜歌，哥仔隨便講都係經典：「基本上全部都聽過哂啦，《紅日》呀、《月半小夜曲》、《夏日之神話》呢啲咪聽得多啲囉。你啲歌越聽越精神呀！」同克勤講到眉飛色舞。

之後有位後生仔就話3歲就聽《球迷奇遇記》，仲對住克勤話：「鍾意咗你廿年㗎啦！」點知克勤笑笑口講：「我都係第一次兜口兜面有男人同我講啲咁嘅嘢啫！」個後生仔仲對住佢唱《紅日》o添！

講完歌，不如講吓老婆盧淑儀，克勤話：「我會覺得咁多年實會有一啲床頭打架床尾和嘅事，大家互相忍讓下又一年，忍讓下又一年咁囉。」唔知點解講到老婆，克勤就怕怕醜醜咁，聽聞當年老婆陀住大仔去日本玩，克勤全程拎住張摺凳㗎，好暖男囉：「咁生仔好辛苦㗎嘛，我有份製造㗎嘛，負番啲責任啫，我唔覺得好肉酸喎，只幫老婆、大肚婆拎住張凳啫。當你有咗小朋友之後，你成日都會拎住啲唔有型嘅物件喺身㗎啦，尿片、奶樽啊……等於我個仔話要去SOGO樓下foodcourt度買嘢食，咁你都唔係有型。」

提到「校長」譚詠麟，佢就話似佢老竇咁：「當然佢永遠喺我心目中，都係我嘅偶像啦！中間嗰十年就開始建立起好朋友嘅感覺。」被視為大台契仔嘅佢，又唔覺得係喎：「邊有咁多契仔吖？契仔即係唔係親生囉，其實我同所有歌手一樣都係簽嗰份『奀之之』一千幾百嘅合約。只係我好明白TVB嗰個玩法係買燒肉都要搭嚿骨啫。」

克勤予人印象正面嘅居多，但亦有孭過「負皮」，好近有過「送禮勤」嘅朵，但克勤認為錯不在自己，所以笑吓都只係小事一樁：「覺得唔夠有型咪唔夠有型囉，你咪睇我嘅樣好似好眉精眼企咁，間唔中都會__吓㗎嘛！」

採訪：余燕儀、懷鈺
協力：劉嘉慧
攝錄：馮峰、Neo
攝影：葉君海
場地：祥勝茶餐廳
造型：Queenie Yu
髮型：Adolph Bow
化妝：Angel Y