喺地產投資界有「摩王」之稱嘅黎汝遠，出晒名鍾意短炒搵銀，近呢十幾年嚟都係主打炒賣寫字樓同住宅。呢排寫字樓成交唔多冇咁好炒，住宅就更加冇得炒，所以呢幾個月冇乜動作嘅摩王改炒舖，啱啱小注用1950萬元買起觀塘一個經營小食嘅地舖。

呢個地舖喺觀塘馬蹄徑3號地下A舖，唔睇地圖都未必知喺邊，得650呎左右，係間專做街坊生意嘅小食店，摩王用1950萬元買入，收緊5萬蚊租，有三厘回報都算唔錯。當然，摩王冇諗住長線收租，即時以2500萬元放賣。唔講唔知，上個月佢已經靜靜雞喺筲箕灣東大街買咗個1800萬元地舖，亦係即買即放盤。