今年49歲嘅張敏，自從03年北上發展，陪伴唔少人成長嘅「綺夢」就逐漸隱居，直至早排張敏話要復出，舊年年尾仲開咗微博，張敏嘅近況先多咗人知。

開通微博冇耐嘅張敏，噚晚忽然喺微博寫咗首詩(新聞連結： http://bit.ly/2p8Kqm4 )，而詩中寫到：「這一世，你安守著我，無約無期……於濃處相惜，在淡處相念，遠近相宜，便是你我恰好的相伴。若可，請許我守住輪迴與你同在，於雲淡風輕裡，銘刻深情。」詩中處處流露愛惜戀戀之情，而張敏所抒發嘅對象，竟然就係人妻周慧敏，搞到唔少網民都以為張敏要向周慧敏作愛的告白。

被指貼詩向周慧敏示愛，張敏今日接受《蘋果》獨家訪問時，反應頗大咁話：「嘩！咁大誤會真係大件事，搞乜鬼啫！你哋有冇睇明個詩詞感覺，我想表達友情之嘛！我年青時已經同佢(周慧敏)好friend，o依家都係，所以一時抒發下！」