韓國性感女團Stellar下月15日會首度喺香港開騷，而佢哋今日下晝就喺香港率先造勢，喺西九龍中心為演唱會舉行記者會，對撼同日出席簽名會嘅女團EXID人氣成員Hani，雖然對方人氣好勁，不過Stellar亦吸引近300粉絲到場。

為撼Hani，Stellar當然係着得勁性感現身。下晝4點左右，穿上黑色貼身衫加熱褲嘅Stellar一現身，台下粉絲即起哄，當中以女粉絲嗌得最大聲。Stellar話之前有私下嚟過香港旅行，不過來港工作就係第一次，所以佢哋都好多謝今日咁多粉絲到場支持佢哋。問到下月港騷有咪特別環節，佢哋就話要保持神秘。之後Stellar就即場表演兩首歌，瞓晒地演出，又作出腿張開、扭pat、自摸等性感動作，台下粉絲亦不時跟住合唱，令現場氣氛非常熱烈。臨走前Stellar亦好識做咁再次多謝粉絲，又企定定做心心手勢俾大家影相。

Stellar其後接受訪問時提到佢哋都食好多，keepfit嘅秘訣係多做運動，又話每日都會拉筋。對於韓國有咁多女團，Stellar認為佢哋嘅優勝之處係性感，而當問到佢哋欣賞邊個女團時，Stellar就笑而不答。