有「債券大王」之稱嘅著名基金經理格羅斯（BillGross）話，隨住按揭利息上升，美國幾百萬次按業主今年可能唔夠錢供樓，俾銀行收番層樓，所以布殊政府應該打救佢哋。上個禮拜五，布殊果然宣佈連串措施幫呢班業主解困。
不過，GregF話：「布殊政府幫呢班業主，可能要加稅，咁其他美國人就要為呢班理財不善、洗腳唔抹腳，搞到冇錢供樓嘅業主孭飛，好唔公平！」Ramius話：「格羅斯主張挽救業主，就應該自己出錢，唔好要啲納稅人畀。」
Non-Sequitur講：「格羅斯其實唔多關心呢班業主，淨係關心自己管理嘅基金，因為佢嘅基金有投資次按證券，如果越嚟越多次按業主冇錢供樓，呢啲基金就會蝕大錢。」

唔救大家攬住死

NeilGus就反駁：「布殊應該救吓班業主，因為佢哋欠落銀行大筆債，啲銀行被迫收緊信貸，最終可能令美國經濟陷入衰退。為大局着想，政府應該出手。」kittymyrib批評：「美國政府都幫唔過，政府喺大約10年前，主張居者有其屋，鼓勵銀行放寬按揭條件，等多啲美國人買得起樓，結果搞出個次按危機。」
美國聯邦房屋企業監管局（OFHEO）話，同舊年第二季比，美國二手樓價上季平均升3.2%，係10年來升得最少嘅一季，因為放款機構收緊條件。標準普爾同Case-Shiller聯合發表嘅報告仲差，指上季樓價按年跌3.2%，創87年有紀錄以嚟最大跌幅。