李力持之前幫親建制網媒「港人講地」拍咗條片，名為「【政改專訪區：喜劇大師】李力持：『國際標準』是廢話反對者根本無『橋』」，皮笑肉不笑地用盡各種語氣表情嘲諷一眾反對政改人士謂:「你要真普選，乜嘢叫真普選？你又攞唔出，喺度念口簧。」

然後李力持在片中做出「鬼食泥」嗌口號表情聲音大加諷刺，再謂:「都講咗幾年啦，你又冇橋，唔好玩啦，我覺得好似細路仔玩泥沙咁呀。」明明大家一早提出各種方案，唔知點解，李導竟然係唔知。(新聞連結: http://bit.ly/1baeA1b )

條片一出街，坊間「反應熱烈」，李力持即於fb回應事件，稱自己的言論只是「搞下笑啫.....唉！！！唔講囉，你講晒啦。」

查實李力持於自己fbshare片時，義正辭嚴話「咪掛獅子山，你一掛佢就拆，叫老大Book架直升機，掛住條留鼻涕?額，冇人除到你，老大大把錢，快去獻計啦！齋粗口中指頂唔得好耐，度下橋啦！」、「對個啲專搞破壞放臭屁個啲臭蟲就好討厭囉，今次一定要趕走所有臭蟲壞蛋。」等等，唔似搞笑。但李力持拋出一句「搞下笑啫」，即係否定晒自己之前嘅立場，再加一句「唔講囉，你講晒啦」，網民笑言李力持真係好小學雞。

經歷過「離地」諮詢政改，同埋梁振英嘅「我有時忍唔住笑」，加埋李力持x親建制網媒彈弓手，依家嘅香港，真係冇嘢冇可能(呀，未飲水思源添…)。學舌鳥呢，噚日就拍咗條片，向李力持呢條「搞下笑啫」嘅「笑片」致敬。鏡頭、場景調度，表情都係向該「笑片」參考出來，就連片末李力持疑似扮「失語」念口簧那部份都「仿照」出來。李力持嗰條，真係笑片；但學舌鳥呢條，身為香港人，實在無限悲涼。

片中學舌鳥title係「史坦尼斯湖游學修司機」木劇大師，條片名為「黃屍真係笑話根本無橋！」，一開波就侃侃而談:「喂，點樣冇標準法？新華日報已經寫明乜嘢叫普選，你可以自己摷得番。再唔係你嫌麻煩我可以再簡單啲歸納你聽，五隻字，全民投票冇篩選，講完。」

「木劇大師」續道:「我問番你，我哋點樣冇標準？你又『哼！』咁樣，喂，你唔好『哼！』我至得0架大佬！我問你點樣冇標準，你又答唔出。」

「拿，我係職業賭徒嚟嘅，我同你打個譬喻，我哋依家去賭馬，你就梗係要買自己隻鹿贏。喂，我哋賭馬喎！『喂唔係呀，嗰隻羊嚟0架，賭住先啦！』喂，我哋賭馬喎，你嗰隻鹿嚟0架咋，『唔係呀，牛嚟0架！有得賭，你真係唔賭？』我哋賭馬喎！『哎呀，我唔同你玩喇，你講來講去都只係馬，你冇橋！」之後「木劇大師」做咗個O嘴表情。

木劇大師再謂:「蔣麗芸話佢上網時發現世界各地都冇真普選呢個字，係香港人發明0架。其實真普選係共產黨發明出嚟，因為共產黨發明咗假普選，我哋咪局住要喺普選前面加個『真』字變成真普選囉。香港人唔止要真普選，仲要真小販真警察，真NewBalance，真奶粉，點解？啲奶假0架嘛！」

「你講笑話，都講啲『真係笑話』啦，點真法呀？我哋冇橋喇，我哋真係冇橋。唱歌嗌口號，又話左膠，冇用；衝擊喇施壓喇，又話很黃很暴力，咁可以點？你話你傾，你諮詢，坐喺架巴士上面隔岸揮手，啲人嚟示威你又話不民主，點傾啫？」

仲未完，去片： http://bit.ly/1DT4GrU