喺唔少觀眾心目中，83年同劉德華一齊拍《神鵰俠侶》嘅蓮妹陳玉蓮，先至係最有代表性嘅姑姑小龍女。久未露面嘅蓮妹噚日出席喺銅鑼灣舉行嘅「一人一個香港故事」記者會，雖然素顏上陣，但仍紅粉緋緋，同場仲有廣播界前輩李我、蕭湘夫婦，以及羅霖等。

呻冇人搵開工

蓮妹話𠵱家花好多時間鑽研道家思想，冇乜留意其他飾演小龍女嘅女星表現。佢話睇到近年嘅古裝劇製作認真，自己都有啲心郁想拍劇，咁啱早前佢喺溫哥華撞到無綫監製潘嘉德，潘監製叫蓮妹不如東山復出拍劇，蓮妹話冇問題，只係怕辛苦，所以唔想拍古裝，仲叫監製返電視台請示吓先喎。蓮妹噚日話：「雖然超過10年冇拍劇，其實我冇刻意推拍，只係冇人搵我啫！」
雖然多年冇拍劇，但蓮妹𠵱家去到內地依然有好多人認得佢，皆因當年套《神鵰俠侶》實在太強勁，到今時今日內地仍然經常重播。蓮妹話佢早前去廣東省同上海，當地人都同佢講，話啱啱先至睇完佢套劇，小龍女帶挈佢知名度24年不變，認真厲害！