當年今日
關於我們

【強調「冇嘢」】同林欣彤劃清界線 天堂鳥Tyrese想娶余思霆

蘋果日報 2018/06/12 23:04

余思霆林欣彤華姐Tyrese天堂鳥歐鎮源

MK組合天堂鳥(現稱B.O.P.)成員歐鎮源(Tyrese)日前被《蘋果》讀者透過「爆相爆片」,踢爆飛甩華姐冠軍女友余思霆,轉與林欣彤撐枱腳(新聞連結: https://bit.ly/2y3jFtb ),天堂鳥今晚就係旺角麥花臣場館參演ROCK'n Life音樂會。
講到今晚女友余思霆冇嚟捧場,Tyrese解釋話女友「極度忙」,有工作在身,所以先缺席,佢話:「佢太多工作喇,因為TVB好錫佢,不過我平日喺香港時間都少,但我哋一路都有保持聯絡嘅。」問到佢得咁少時間都寧願約林欣彤,唔約女友?Tyrese即解畫:「唔係呀,其實嗰次我係好空閒、好即興約嘅。」問到女友有冇嬲,Tyrese話:「唔會,大家不嬲都好信任嘅,我哋14年一齊,一直都係Long D嘅,但大家嘅信任都好強,我唔會管佢,亦都互相俾好大自由度,唔使互相報告,有時最多係事後講番俾佢聽,Tyrese話佢同余思霆感情穩定。
講到林欣彤被指係小三,Tyrese話:「我好抱歉,其實佢都係我好欣賞嘅歌手,但係對於完全唔關事嘅佢被拖落水,我覺得好抱歉,希望大家唔好誤解,自己都有去搵佢say sorry,同佢講唔好意思。不過可能大家聽佢啲歌太投入,覺得佢會咁樣做,但其實我哋之間係冇嘢。」問到Tyrese同女友感情穩定,會唔會諗結婚,Tyrese坦言:「都想嘅,但唔係呢個時候囉,o依家係博殺期,佢都係啱啱入行啫,女仔嘅青春都係24至26歲嗰幾年,所以大家都想專注工作先。」佢仲話大家有共識去以結婚為目標。
講番個騷,B.O.P.喺現場唱咗《Take me higher》同《Set me free》,佢哋話希望年底會有演唱會送俾fans。其後佢哋接受訪問時透露,已經入紙申請九展Star Hall,希望可以11月做到。B.O.P.話好想返香港演出,加上頭先見到觀眾啲反應,好開心,佢哋指喺大陸做騷,啲觀眾雖然都熱情,但因為唔係fans,所以都係有啲唔同。
問到佢哋演唱會有咩特別之處,佢哋話要諗吓有啲乜嘢係之前未做過嘅,有記者笑言叫佢哋唔着衫跳舞,點知佢哋推Tyrese出嚟,叫佢唔好着褲演出。B.O.P.又話:「喺香港都3伡冇開騷喇,上次大家話我哋冇歌唱,今次一定夠歌,仲會請個重量級嘅嘉賓,就係Eason陳奕迅,因為Eason曾經講過『就算係天堂鳥都要支持』,不過因為未落實到場地,如果落實到的話,好希望可以請到佢。就算唔可以做嘉賓,佢嚟到睇都已經好好。」
精選娛聞,喺晒《娛果》
http://fb.com/appledailyent
empty
(攝影:仇志德)
empty
天堂鳥(現稱B.O.P.)今晚喺麥花臣參演音樂會,仲話希望今年11月成功開騷。
empty
Tyrese被問到同林欣彤單緋聞,佢話其實真係冇嘢,而佢同華姐冠軍女友余思霆有共識結婚。