現年24歲嘅日本男星竹內涼真今年上位成為劇界搶手貨，點知隨即爆出佢秘戀22歲E cup偶像里里佳嘅地下情消息，仲過夜斷正。竹內涼真嘅拍拖消息連日來成為熱門話題，繼女方所屬事務所回應指兩人屬朋友關係後，今日輪到竹內涼真終於親自回應緋聞，佢為保飯碗聲稱同里里佳只係普通朋友。

竹內涼真今日偕役所廣司、山崎賢人等拍檔宣傳合演嘅TBS日劇《陸王》，並出席只招待女性嘅特別試映活動，由於正值風頭火勢，竹內涼真自然成為焦點，佢被問到緋聞時亦有備而來，仲表示：「我哋係朋友。要大家擔心真係感到抱歉。」未知呢個答案能否為佢挽回一班女fans。