【馮仁昭四圍超】嫌育嬰心得過氣拒傳授
嘉欣做定禮賀黎明

蘋果日報 2018/04/12 00:00

李嘉欣噚日到跑馬地馬場出席「2018愛彼女皇盃」活動，陀B三個幾月嘅宋熙年擔任大會司儀。提到黎明就快做爸爸，嘉欣連聲恭喜：「恭喜佢，諗唔到佢踏入人生新階段。」不過嘉欣就話唔想騷擾黎明，所以冇打電話恭喜，但會做定賀禮。問到會唔會交流育嬰心得？嘉欣自嘲唔夠update：「佢可以handle到嘅，有愛就冇問題。」
講到囝囝Jayden已升小學，嘉欣話教Jayden做功課有磨擦好無奈，但希望唔會影響感情，最近除咗幫小朋友備課，有時會幫老公處理事務，生活都幾開心。會唔會生多個？佢話：「順其自然，隔得太遠，養小動物都幾開心。」
empty
嘉欣唔想騷擾黎明，所以冇打電話恭喜佢。
empty
黎明就快做爸爸，嘉欣話諗唔到佢踏入人生新階段。互聯網圖片
empty
嘉欣教Jayden做功課有磨擦，搞到佢好無奈。互聯網圖片
宋熙年老公緊張
同場嘅宋熙年就貪靚着3吋高踭鞋現身，佢話：「我落台就會即刻換番，因為怕對腰唔好，都要買番啲低踭嘅鞋，老公超級緊張，食啲乜、坐姿係點、企姿同動作快啲都好緊張，因為第一次，乜都唔識，佢好無助。」宋熙年仲話好彩冇唔舒服，只係初期有啲攰同胃口唔好，嚟緊想同老公去澳洲旅行，把握二人世界機會。至於今胎係仔定女？宋熙年話：「BB好怕醜，睇得唔清楚，等做多次掃描就會同大家分享，最緊要BB健康，第一個冇壓力，第二個要追番另一性別可能會大壓力啲。」
撰文：馮仁昭
empty
陀B嘅宋熙年，噚日着3吋高踭鞋現身女皇盃擔任大會司儀。