日本影后中山美穗不單擇偶口味另類，近年佢都可謂遇人不淑，同打扮女性化嘅前夫辻仁成離婚後，被人唱到形象插水，又話佢背夫同音樂人澀谷慶一郎發展不倫戀，為姦夫放棄10歲囝囝云云。至於半年前，美穗被指遭現任男友澀谷慶一郎暴力對待，好彩佢已經親口否認。

現年45歲嘅美穗，於02年宣佈嫁畀電影作家兼音樂人辻仁成，可惜婚姻維持12年卻不歡而散，辻仁成忽然以慈父形象自居，令被指拋夫棄仔嘅美穗更加形象破產。

辻仁成離婚後日日都透過twitter寫父子情，日前仲貼出一幅熊仔圖，話係囝囝辻十斗嘅作品，望真啲圖中有一隻大熊攬住小熊公仔，似係代表辻仁成兩父子。

其實美穗嘅twitter帳戶一直用同款熊公仔作為profile照片，有網民就認為辻仁成此舉似挑釁緊美穗，究竟係咪想刺激美穗？呢點真係不得而知....

追溯番今年4月，辻仁成曾洗版式暗寸美穗，不甘被揶揄嘅美穗當時有立即發功，留言鬧爆前夫「正乸型」！