陳昭昭、袁潔儀等藝人，噚晚去到又一城出席電影《非同凡響》優先場，袁潔儀話過兩日會同黑仔姜皓文夫婦，仲有幾個朋友一齊飛去泰國玩幾日：「我哋一班朋友都上晒年紀，平時會傾驗身，有朋友提議去泰國做body check，玩之餘又可以做檢查，平靚正，幾千蚊就可以驗到身，所以想試下。」

袁潔儀笑言雖然今次旅行幾有意義，不過老公本護照過咗期，好可惜唔可以同行。講到身體狀況，佢話：「OK嘅！不過有時瞓醒手指會痲痺，所以想驗下身，平時同朋友都會講養生，14年返電視台之後，見到好多前輩走咗，覺得健康真係好重要。」

另外，之前喺做大陸做開買賣車位生意嘅昭昭，最近接咗兩個樓盤廣告代言人工作，佢話因為兩個樓盤都唔係住宅，所以唔夠錢買嚟投資。至於佢同鄭少秋合作拍ViuTV新劇情況，昭昭話好大壓力：「其中一幕要我勾引秋官，對住大佬官做戲真係大壓力，不過佢好人教我做戲，但我NG太多，怕阻住老人家唔鍾意，又怕阻住人收工。」

精選娛聞，喺晒《娛果》
http://fb.com/appledailyent