內地樓市調控令內房股昨日全線崩圍，炒兩會有好消息者出現絕望性沽貨。內房股一向受政策左右，即使樓賣得好，房價也升，只要政令一出亦會跌到你唔信，所以稍為資深的投資者對內房股都不敢太過睇好，怕跌下來一鋪輸清。
除內房股受政策影響，建材股也瀕臨轉勢，華潤水泥（1313）公佈優於預期的業績後，雖有大行看好，但亦有睇法悲觀，認為今年水泥產能增加令水泥價格受壓，以大摩為例，為業績鼓掌卻同時建議沽售。
業績是跌市導火線，另一例子是中信泰富（267），早前美林已估計其業績將大幅低於市場consensus，結果公司上星期公佈全年業績的確跌24%至69.5億元，大遜市場平均預測的80多億元。放榜後中信泰富挾過一日，但迅即打回原形。

特鋼地產業務不樂觀

睇完業績見過管理層，近日大行紛紛出報告，其中瑞銀預期中信泰富今年業績無大改善，前景仍然疲弱，維持沽售評級，目標價由7.20元降至6.20元。按昨日收市價，下跌空間43%。
瑞銀指公司去年業務表現欠佳，管理層亦未預示今年特鋼會有明顯改善，而地產業務今明年的項目落成進度亦不樂觀，故降低今明年盈利預測分別36%及42%，以反映鐵礦產能及特鋼盈利的下跌預期，及利息增加與成本上升等因素。內房、建材都是近日開始轉勢向下的股票，中信泰富兩者兼具，睇怕都係易跌難升。

歐陽風