股市低迷，樓市呆滯，但呢個正好係唔少人入貨嘅好時機。葉劉噚日就喺南區香港仔開咗個議員辦事處，連同用匯賢名義喺鴨脷洲以及筲箕灣開嘅office，佢喺港島區已經有四個檔口，但原來佢仲未夠喉，話最想喺東區都有個竇，所以會積極物色心水地方，睇吓邊度租得過。

不過，就算有好地方，葉劉都唔會即時扑槌話要租，因為佢同唔少市民一樣，覺得個樓價會繼續跌，相信租金都會平啲，預計明年初先至應該係租寫字樓嘅好時機，計落慳番唔少經費。葉劉話喺商場租議員辦事處唔容易，因為好多業主都嫌議辦冇乜人流，帶唔旺個場，所以佢哋要搵檔口亦有難度。至於香港仔呢個筍盤係街坊推介，佢睇過唔錯就租咗，日後會抽時間去南區議辦接見市民。
樓市執平貨，外傭稅一役，雖然政府明益民建聯唔益佢，葉劉表現一樣逆市上升。葉劉話，會一直爭取永久撤銷外傭稅，唔畀政府輕易過關。做立法會外傭稅小組委員會主席嘅葉劉稍後都想繼續冧莊，不過機會肯定冇乜，事關政府見識過佢嘅厲害，好可能會聯同建制派封殺佢。