「小店」兩個字，係有一種魔力嘅，唔知點解，入去舖頭前，你硬係覺得佢會好食啲；當然，坐低食完，可能又係另一個世界。心理上為小店畀premium，可能源於「越是期待越是美麗」，你對佢會有一種期待；唔似食連鎖店，「M記？我知係咩味啦」；又或你總係會覺得「小店」等如「人情味」。於是，唔少集團都好鍾意扮小店，呢方面美心當然係專家；但有另一個品牌，大家都唔可以睇漏眼，講嘅都係行多品牌路線嘅太興（6811）。

太興上星期公佈上市後第一份全年業績，全年核心盈利1.35億元，按年跌11.9%。講到收入，全年收入增長4%至32.52億元。你可能會問，說好的「罷食藍店」呢？都仲有過30億收入？罷食真係冇用？

咁再拆細條數，單計香港業務，下半年收入12.73億，按年增長只係1.8%，近乎冇增長，對比起上半年錄一成增幅，算係大縮水。不過，你話係因為香港整體氣氛差，令生意一般，定真係因為「罷食藍店」有效果，Sorry，呢方面數據上睇唔到。

不過就一樣睇到嘅，就係「改名轉運」睇來真係有用！相信喺唔少人心目中，「太興是藍店」印象入咗骨，how about錦麗and敏華冰廳？來來來，讓數據來告訴你。

敏華冰廳全年收入增長148%至近3億；下半年社會運動咁激烈，但敏華收入增幅都好激烈，升130%至1.86億；
至於食牛肉粉嘅錦麗，年收入增長44%至1.38億元，單計下半年，都有18%增幅，做7,050萬生意。

大家要知，單係「太興」一個品牌，全年收入係跌半成。咁即係話，太興多品牌發展，可能已發揮作用。你可能會問，唔係應該同店銷售比較先公平咩？我哋而家分析黃色經濟圈有冇用，講緊係香港人實際畀咗幾多錢太興，所以同店銷售呢個考慮可以暫時忘記。

今年份全年業績同上半年業績比較，旗下品牌又多咗兩個名，包括圓方「瓊芳冰廳」、中環「亞參雞飯」，兩間暫時都係得一間分店。呢兩間未來會唔會連鎖化，我唔知；但相信太興未來會再試更多唔同品牌，而呢種策略，的確會減弱黃色經濟圈對佢嘅影響。所以只可以話，大家揀餐廳時，如果要有黃店嘅堅持，就真係望多兩眼。

by千頌C@堆填區
http://fb.com/winbigwok

-----------------------------
【武漢肺炎】專頁
全民自救 抗疫資訊盡在《蘋果》
-----------------------
屬於香港人的移民攻略
立即登入【全球樓行】
Dream House零距離