4月第3個交易日，係時候總結金手指篤過嘅「一注獨贏」貼士。可以用以下8個字做總結「白銀油價，回穩上升」。
以下就係09年第二季展望。
白銀：自從舊年10月見過8.48美元一盎斯之後，白銀就展開升浪，不過，每次升浪嘅波幅都幾大，平均高低位相差兩成。不過到第一季埋單，白銀升咗13.9%，收12.97美元。

維持原判買白銀

花旗國聯儲局已實施「印鈔票送畀政府使」政策，宣佈當日金、銀都急升。雖然，因為市場覺得聯儲局宣佈會印嘅3000億美元其實好少，金銀升完開始跌，不過以聯儲局家買國債嘅速度，好快就會用晒3000億。到時再印，金銀就會再升。
孫柏文作為白銀戰隊隊長「白銀文」，維持原本建議：強力買入。目標價：120美元一盎斯。有效期至：2016年3月6日。
中油香港（135）：股價喺第一季升36%，收3.28元。上個禮拜公司出業績時，都分析過點解08年每股盈利升72%，令市盈率得4.8倍。公司運作非常穩定，盈利高低將會因油價而變動。
公司手頭上有50億現金，即平均每股超過一蚊，現金流超勁。家咁多外國三、四線油公司唔掂，周圍都係平貨。大家不妨繼續留意公司高層點用呢筆錢，求神拜佛出國買啲超平油田。
孫柏文
http://phatdat.blogspot.com