佔領中環蓄勢待發，狼振英就靠嚇話阻塞交通係犯法行為；7.1遊行，警隊一哥曾偉雄又話開多條行車線會嚴重影響港島交通。郁下都要拉要鎖，小市民真係巧京京。但狼太唐青儀噚日竟然率先「佔領」銅鑼灣馬路，仲聲稱無犯法。咁又係，「阻碇」唔係罪嚟㗎，否則佢另一半狼振英，一早被捕啦！

打斜停中線成分鐘

有路人甲噚日漫步銅鑼灣，喺崇光百貨對出嘅軒尼詩道，見到架車牌AM108嘅特首夫人座駕，打斜停喺中線，車門打開，狼太唐青儀企正喺馬路中心，吩咐司機做嘢，講足差不多成分鐘。
據路人甲現場所見，狼太大搖大擺霸佔銅鑼灣最繁忙嘅主幹道兩條行車線，搞到後面所有車大排長龍，但狼太似乎懶得理。路人甲好不滿，因為銅鑼灣交通好繁忙，附近又係巴士站，覺得唔應該停車上落客；就算普通司機都唔應該咁做啦，質疑特首夫人竟然知法犯法，所以影低佢罪證，公諸於世。
根據建制派批評佔領中環嘅邏輯，狼太今次佔領軒尼詩道，肯定會導致銅鑼灣大癱瘓，造成災難性經濟損失；咁罪大惡極，至少都坐番十年八載啦。但八方問過資深司機，佢哋話狼太若然喺禁區上落客，最多定額罰款450蚊。450蚊就可以佔領銅鑼灣，真係抵到爛！
咁仲未夠絕呀，特首辦噚晚回覆八方，話狼太落車嗰個位，剛剛好唔係禁區喎，咁即係：450蚊都慳番囉！佔中三子，學到嘢未？

mailto:[email protected]

倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24