韓國三人男子組合JYJ，前晚喺亞洲國際博覽館舉行「TheReturnoftheKing－世界巡迴演唱會香港站」，成員金在中、朴有天同金俊秀，喺台上載歌載舞，又自摸同與女舞蹈員大跳性感辣身舞，引起一浪浪嘅尖叫聲。

不過三子前晚表現似乎有啲失準，金在中更唱到甩嘴，之後佢大方晒紋身同肌肉向觀眾耍冧，粉絲當然收貨啦！

JYJ三子事隔三年，前晚再次合體喺香港開騷，現場入座率都有八成。成員朴有天嘅細佬朴有煥以及媽媽，都有到場支持，不過因為喺台下引起哄動，最後只好喺開騷前離場。

JYJ三子前晚毫不吝嗇咁大騷肌肉，當中金在中最為大方，大晒肌肉同紋身，反而之前被指暴脹唔少嘅朴有天，惜肉如金，全晚包到實一實。

金在中前晚邊唱邊流鼻水，演唱《InHeaven》時仲早咗入beat，唱甩嘴，之後佢就踢爆自己被係被朴有天傳染感冒。為咗補償粉絲，金在中最後赤裸上身益街坊，全場立即瘋狂尖叫。

JYJ前晚大冧港迷，力讚港迷比香港靚，金在中不忘抱怨住機場附近，冇景色睇。不過識嘆世界嘅金俊秀就唔同啦，佢自爆開騷前靜靜雞撇甩隊友，同10名工作人員去市區睇夜景，仲大擦3隻避風塘炒蟹，話喺香港好自由，好想嚟香港住。

成員埋怨金俊秀獨自偷歡，金俊秀只好承諾完騷後三人一齊入市區玩。噚日凌晨，金俊秀就喺twitter公開喺尖沙嘴海旁嘅悠閒相，未知係咪同成員同行。