建制派成日話自己幾咁愛國，但實質上連個國係點都唔清楚。好似喺九龍東出選嘅民建聯蔣麗芸，成日以愛國自居，但噚日喺黃毓民挑機下就露晒底。黃毓民問佢，中國五星紅旗上嘅四粒小星，究竟代表啲乜呢？只見Ann蔣即時信心十足咁話「士、農、兵、商」，結果被在場人士笑到面黃，事關答案係工人、農民、小資產階級同民族資產階級。
毓民點會咁輕易放過呢個盲目愛國者，再度質問佢知唔知大躍進死咗幾多人？呢鋪Ann蔣口啞啞唔識答，即時被毓民話佢「學乜人愛國」。專砌民建聯嘅林依麗亦一度畀條皮帶Ann蔣，叫佢演繹吓李旺陽可以點樣雙腳着地吊頸自殺。