英國佬係有諗頭，《Q》周不時有好橋，五月號就搞咗個史上最差唱片選舉，第一位係DuranDuran的《ThankYou》，這張唱片我當年聽過一次，現在當然全忘了，印象中好似唔係咁差啫，無端端成了史上最差，我反而想買番嚟聽吓。如果要我揀我聽過史上最差的唱片，孔慶翔那張誠意之作一定入圍，但係《Q》一定唔會揀，因為這種選舉一定係揀啲有名氣、你以為佢會好的唱片，咁至顯得選舉有意義，而負責選的人才夠權威。好像蘋果娛樂版搞的「金話梅獎」，我就覺得替那些得獎者不值。

《我阿媽發仔瘟》由片名到製作意念，已擺明係好有誠意搞一部爛片，所以佢爛係必然。要我揀一定係《喜馬拉雅星》，強勁卡士，兼係賀歲片，拍得胡鬧又混亂，韋家輝永遠迷信他的瘋狂世界意念。《鬼馬狂想曲》已吃不消，《最愛女人購物狂》有人話好，我覺得係由負一百分，變成十分，進步已經好大，但距離合格仍好遠。我認識韋家輝二十年以上，就因為佢係一個我佩服的編劇，才不明白點解拍電影會搞成咁呢？
無論係揀孔慶翔的唱片還是電影係史上最差都冇意思。《Q》的名單內便有NaomiCampbell、MickJagger、Oasis等，仲有WilliamShatner，即係我上次介紹《星空奇遇》位葛克隊長。乜佢出過唱片咩？