【積奇論戰】勝利在望!韋達喜獲一隻筍馬
積奇論戰
今次(20日)快活谷夜戰,用狹窄的C加三跑道角逐,近期谷戰跑道形勢頗平均,內置守好位,未必一定佔優,直路飛得太出,蝕位多也無着數,反而在中間位置展衝刺,有更好效果。莫雷拉停賽,潘頓成追捧對象,座騎實力唔錯,馬房方面可留意高伯新。
第三場四班1650米,「再創商機」外地贏1400及1600米,來港後一直跑短途,到上季尾最後一役轉戰同程谷草一哩,即爆出35倍冷門,但其後轉投霍利時馬房。今季初出狀態未夠,跟三段墮退,熱身後近三仗跑沙田1200、1400米都跑第四,有試準味道。今次「再創商機」跑番首本路程谷草一哩,試跑火旺墜手,走勢吸引,初用韋達有鬥志,排三檔有助,今仗應是出擊目標。
同場「按得澄」上仗泥地追入第四,表現中規中矩,然復課好受操,潘頓親自考驗,今次出戰一哩應合腳法,可繼續跟進。「靚先生」上仗抽配布達德,可能唔熟場地及馬性,結果未盡發揮下都可追近,今次回配合拍李寶利,三甲甚穩。「威震天」戴開縫眼罩試大閘有前有後,草地拍跳不遜頂班「有得威」,今仗應有截然不同演出。「歡喜心」多跑狀態已到位。