好耐冇喺香港拍電影嘅朱茵，早前拍咗部驚慄片《古宅》，戲入面佢同張繼聰飾演母子，朱茵今次仲要由20多歲演到60多歲，仲要扮阿婆化老妝，真係大犧牲。部戲係喺一座百年古宅拍攝，講朱茵要獨力養大個仔，而演阿仔嘅張繼聰要離開，做阿媽嘅朱茵萬般不捨。當日拍攝時，阿聰要離開農村生活，兩母子為此發生爭拗，最終朱茵慘遭「兒子」阿聰拋棄。

育有一女嘅朱茵講番呢場戲時，都已經眼濕濕，佢話：「故事講我個仔已經長大，不停講想走，但我次次都阻止到，不過今次就阻止唔到，我角色嘅世界就只有個仔，連個樣……（手抹淚）我係咪都喊緊，連支柱都冇，作為一個媽媽最驚嘅事，就係孩子要飛走喇。」講完朱茵聲線仍哽咽。喺花絮片段中，朱茵攬住小演員嘅喊戲，導演cut咗機，朱茵仍未抽離到角色，繼續好淒慘咁喊。

今次朱茵經過特技化妝變老，膚色暗黃、眼紋盡現，講到佢今次要犧牲靚樣變老，佢毫不介意，仲話今次因劇本同角色吸引而接拍：「呢個角色好堅強嘅地方，係屋企有咁多怪事發生，但佢都要守住個仔同個家，呢套戲唔單止係驚慄片，仲係用母愛去包裝嘅驚慄片。」至於有一仔一女嘅阿聰直言拍完《古宅》後，感到害怕，所以會對孩子更好，經常會親吻對仔女。

精選娛聞，喺晒《娛果》
http://fb.com/appledailyent