由韓國金牌製作人羅䁐錫製作嘅tvN綜藝節目《花樣爺爺》自2013年開播以來，都深受觀眾歡迎，當中更先後已推出三季，早前tvN方面確定會開拍第四季，前日更落實由原班人馬李順載、申久、朴根瀅及白一燮等參演，四位爺爺一齊出發去旅行，李瑞鎮亦會繼續留低喺節目中負責做阿四，包括搬運行李同埋翻譯等。

而新一季《花樣爺爺Returns》將會到舵國進行拍攝，除咗原本四位爺爺外，今日韓國方面更報道，《與神同行》男星河正宇嘅72歲爸爸金容建亦落實加盟做第五位爺爺，金容建近年主力拍劇，去年先後拍攝《有品位的她》及《善良魔女傳》，今年亦有拍攝《牽著手，看夕陽西下》，而佢出演綜藝節目《我獨自生活》時，曾自爆成日睇《花樣爺爺》，同時李順載亦都曾透露金容建都好想出演《花樣爺爺》，亦都一直等緊呢個機會。

另外，五位爺爺及李瑞鎮將會於後日起程到德國拍攝，節目將於本月29號首播。

更多韓流，喺晒《娛果》
http://fb.com/appledailyent