當年今日
關於我們

【母女餅印一樣】媽咪拒絕到冰室做收銀 裕美想去日本千里尋父

蘋果日報 2018/09/10 16:41

壹傳媒裕美華星冰室

華星冰室進駐壹傳媒飯堂,股東之一裕美今日現身幫手做收銀,親力親為,裕美說:「呢段日子除咗嚟做收銀之外,仲會喺華星工場研發中式餅,希望整啲餅喺度賣,所以乜都要學,做收銀都幾好,因為我數學好弱,有機會畀我練習吓,買餸唔會畀人呃我幾蚊。」
不過,之前裕美嚟做收銀時,有員工反映佢曾找錯錢,裕美聞言睩大眼說:「真係㗎,找多咗呀?咁我一定係想祝福佢嘞,唔緊要,我倒貼落去賠番,開頭嚟講我有出錯都正常,只要唔係太過份就得。老闆開餐廳肯畀機會我試,唔驚我做收銀找錯錢,因為出錯好麻煩,尤其是派我喺繁忙時段做,有乜甩漏真係越幫越忙,好記得第一次收銀返到屋企好攰,原來啲姐姐咁勁,可以心算勁快,我要用埋計數機。」
對於有報道指媽咪在停車場做看更,裕美澄清:「佢唔係看更,同我一樣係收銀員,其實OK嘅,佢做嘢都開心,因為佢以前夜瞓,做嘢之後早瞓啲,再加上我o依家拼搏工作,希望佢過好啲生活。」問到有冇諗過介紹媽咪嚟華星冰室做收銀?裕美坦言:「其實之前有介紹過,但我媽咪唔係好慣見咁多人,性格怕醜,所以最後佢選擇停車場做,因為少啲人,我有同佢講,辛苦就唔好做,佢話唔辛苦,只係坐喺度,雖然時間比較長,但佢好enjoy,同埋我媽媽好好㗎,佢會餵啲麵包仔畀白鴿食,有時我放假,就會陪佢飲茶。」
裕美嘅父母離異多年,佢跟日籍爸爸已失去聯絡,現31歲嘅裕美很希望搵番爸爸:「小學六年班之後冇聯絡,因為我依家大個,好想plan去日本搵佢,嗰時冇o依家科技發達有facebook,加上日本人、尤其是我爸爸年代唔係咁鍾意用網絡世界,所以唔係咁容易搵到佢。」有冇信心搵到爸爸?裕美說:「要搵一個人揭盡所能一定搵到,或者要叩好多門,因為我試過喺香港嘅領事館搵,但佢建議我去日本嘅領事館搵容易啲,我諗住呢一兩年一定過去,因為爸爸都年紀大,希望盡快搵到佢,希望佢健在。」
精選娛聞,喺晒《娛果》
http://fb.com/appledailyent
empty
裕美同媽咪都做收銀(右圖攝影:仇志中)
empty
裕美今日到壹傳媒飯堂做收銀
empty
裕美計劃呢一、兩年到日本搵爸爸
empty
裕美媽咪後生時跟女兒似餅印(受訪者提供圖片)