每次人民銀行公布上調存款準備金或利率，我哋幾乎都可以響電視上，聽到一把男聲，好肉緊咁用普通話評論人行應該點點點，呢位人兄響內地嘅知名度，幾乎等同陸叔陳永陸，佢就係中央智囊之一嘅社科院金融研究所旗下金融發展與金融制度研究室主任易憲容，佢自從升咗做室主任後，搵佢做各類評論嘅人日多，佢亦越講越多，範圍由金融政策講到去地產，雖則佢話地產商都怕咗佢，但查實人家睇佢，只係一個空有理論冇實踐嘅「空空」蛋頭先生。
唔知係咪太多人認為佢冇調查研究就冇發言權，前日社科院金融研究所所長李揚就借一個學術會議透露，易憲容已經辭咗個室主任職位，不過仲係研究所嘅研究員，咁即係降職啦，李揚話：「我哋呢度唔允許唔經論證、冇根據，就發表言論」，「房地產問題非常複雜，唔係開架車去三環路轉幾個圈就講得清楚嘅。」經此一役，唔知一向正直嘅老易會唔會收聲呢？
[email protected]