香港嘅社團商會近年都積極革新，想追上時代步伐同社會真‧connect，鞏固會員梗係必然啦，香港潮屬社團總會就有新猶，推出優惠咭計劃，出晒力聯絡咗111間食肆美容珠寶旅行社等商戶，提供各項優惠，除咗潮聲潮氣嘅佳寧娜（潮州）酒樓、潮庭同和記隆餅家等等，亦有莎莎國際、周大福同康泰等大力幫忙，總會仲特別設計咗手機APP，等會員撳一撳手機，就知道優惠有乜update，6月起已陸續發出，希望至8月底可以令旗下38個屬會同12萬會員及義工，實行「人人有咭用，潮人用潮咭」。

除咗優惠咭，總會亦會喺12月6至10日喺中環遮打花園舉辦「潮州節」，一如以往又係好多地道嘢食同表演項目，總會主席陳幼南預告，會親自去潮州尋覓美食以便喺「潮州節」呈獻，仲話會搞「出花園」儀式。喺遮打花園「出花園」，即係點？其實「出花園」係潮汕地區嘅一種成人禮，為15歲由細路變大人嘅潮人而設，總會話佢哋想透過「成人禮」，畀年輕人知道大個仔嘞，要有擔當，具體形式仲諗緊！