農曆新年話咁快就到，小妹都想買番本運程書嚟趨吉避凶。揀多幾揀，見到一本幾另類嘅「運程書」，叫做《知命‧改命》。啱晒小妹啦，但價錢唔平，賣成99蚊一本。

揭開本書一睇，第一章開宗名義叫知命篇，另外仲有事業篇、感情篇同健康篇，但係冇晒啲龍、蛇、雞、牛等等生肖嘅運程分析。其中知命篇嘅改命技巧速成班，點知唔係教人邊度邊度放盆水嘅招數，而係用實際行動改命。
咁搞嘢？作者原來係黃毅力，即係賣水貨車賣到發達嘅富利堡老闆Eric。小妹咪撥個輪畀佢，問吓係咪金融海嘯好唔掂，要出書幫補。
Eric話，呢排見到啲管理階層嘅客，遇喺金融海嘯損晒手，只會怨天怨命，擺放風水陣。信風水唔緊要，最弊佢哋跟住繑埋手等運到，所以就花咗四個月將佢過往嘅實戰管理經驗，教人用實際行動去改變迫到埋身嘅逆境，唔好淨係坐喺度等運到，「個巿唔掂，我即刻大搞開倉、一蚊雞賣車，埋單都蝕幾百萬，但套現咗2,000幾萬，可以再投資。」
Eric仲話，所謂改命，就係武裝自己，改變自己，搵吓搵吓就有成功機會。
電郵：mailto:[email protected]
逢周日刊出