馬會正檢討近排連串爭議事件，負責嘅賽事規管及發展執行總監夏定安近排亦密密出去收風，睇吓點樣改善現行嘅問題。若非早前公眾馬迷咁大反應，馬會都未必大動作檢討，其實唔少馬迷一直都好關注馬會製作嘅官方賽馬節目質素，應該都想馬會下季作出改善。

早排越洋賽事講錯馬唔認錯，同刪剪「翡翠紅星」墮馬片段，馬會影視部衰得好難睇，事實馬會製作嘅賽馬節目近年收視亦一直低企。無可否認，要做到昔日董驃主持賽馬節目嘅水平，對馬會影視部簡直係奢求，但咁耐以嚟越做越差，究竟官方製作係咪就必然趕客？

好多馬迷特別唔滿意馬會節目主持，唔鍾意佢哋以為自己係明星級馬評家，言論又唔敢批評有問題嘅跑法同裁決，馬迷對主持嘅賽事評論有期望，都想佢哋代表發聲，但係乜都河蟹，真係睇到激氣。雖則主持係打馬會工，但係咪講幾句公道批評都唔得？彈兩句真係會俾馬會炒魷？其實馬評人冇可能吓吓避重就輕，淨係顧住擦鞋嘅講馬佬自然難得到觀眾認同。

馬會影視部嘅台前幕後班底係咪出咗問題，或者係咪需要換人革新，其實大家都有答案。賽期頻密，有質素嘅賽馬節目係幫到馬迷，賽馬節目製作差，馬會亦冇藉口姓賴，馬會有錢有資源，若咁都搵唔到人才就真係無話可說，只係視乎影視部有冇心嘗試改變求進。

阿Joe