肥姐沈殿霞接受通膽管同切除部份肝臟手術後，至今仍然喺瑪麗醫院深切治療部留醫，前日國慶，秋官鄭少秋帶埋同官晶華生嗰兩個寶貝女詠恩同詠曦，加埋欣宜，一齊去咗中環ifc睇由馮小剛執導、章子怡同吳彥祖主演嘅電影《夜宴》，共聚天倫，到夜晚差唔多8點，欣宜同秋官步出戲院，但唔見咗兩個妹，秋官笑笑口話：「驚咗你哋呀。」

探完肥姐再去纖體

之後秋官就帶欣宜去咗ifc嘅三樓食飯，到夜晚大約10點再車欣宜去醫院。欣宜喺病房逗留咗一個鐘先走，離開嗰陣見到有本雜誌以肥姐瞓病床嘅相做封面，即刻話：「你哋咁勁嘅，呢張相都畀你哋影到。」當知道係舊相之後，佢先話：「你哋有冇呃我呀？」
噚日上晝11點，欣宜又再出動，同兩個姨媽帶咗啲補湯同通心粉去醫院探肥姐。心情勁靚嘅欣宜話前晚同爹哋睇戲好開心，仲讚男記者着嗰條牛仔褲好靚，佢話：「返嚟香港都冇時間shopping，因為要照顧媽咪。」逗留到下午兩點，欣宜就坐的士去尖沙嘴進行纖體療程，大約6點左右再返醫院。肥姐嘅兩位家姐就話肥姐已經可以落地行，問到中秋前可唔可以出院，佢哋就話：「快㗎喇，多謝關心！」