蘇永康噚日母親節喺澳門舉行「蘇式情歌演唱會」，囝囝Jazz、老婆、外母同蘇媽媽都有去捧場。阿公(蘇永康)特別選唱張國榮嘅《追》送畀老婆同囝囝，本來更想帶囝囝上台聽佢唱歌，可惜Jazz由佢開場就一直喊到完場，所以未能上台，老婆一直喺後台湊仔，連騷都冇睇過。

有仔萬事足嘅阿公演出後第一時間返後台睇仔，佢坦言自己唔係年輕做爸爸，所以非常珍惜同兒子相處嘅時間，不想錯過佢成長嘅每一刻，阿公又話：「本來想唱《追》歌詞 『有了你即使平凡卻最重要』俾阿仔聽，可惜想帶佢上台一刻，佢剛剛喊完食緊奶，所以只好放棄，留待下次有機會再帶囝囝上台同歌迷見面。」

老婆過第一個母親節，蘇永康話因為佢剛由加拿大工作回港，馬上又去澳門開騷，所以根本冇時間去買禮物，幸好老婆都明白，冇怪佢，阿公笑言：「阿仔收利是收到最近仍然有得收，人仔細細已經非常有米，老婆應該攞阿仔部份利是去買禮物，當作係阿仔送俾媽咪。」

Jazz得兩個多月，不過阿公就已經開始頭痛囝囝入學讀書問題，並且已經為囝囝報定名讀playgroup，佢話：「8至10個月就要去讀playgroup啦，所以近日我老婆已經叫我搞報名啦，報名先知o依家讀書咁複雜又貴，個仔出世兩日，梁芷珊已經帶咗成大堆報名表嚟俾我，話有間即將開嘅英國學校，入場費二百萬，嘩，真係貴到呢！我其實都唔係好識，所以準備等千嬅忙救完志明之後，我都想約佢出來問吓佢心得，請千嬅做指路明燈。」